自由廣場有講著台語文字，有必要koh探討。

台語語源（etymology）有兩大部分：漢語kap非漢語。

你我神鬼是漢語，大家lóng知，有漢字通寫。這中間，「你」mā有「你、爾、汝」三字通用。非漢語部分有原住民語ò-giô（愛玉）、môa-sat-ba̍k（虱目魚）、assey（阿西）、rauwa（佬仔，原意是蜘蛛）；英語hose（水管）、ma-lá-lí-á（虐疾）、salmon（三文魚）、box（用拳擊人）等；西班牙語pháng（el pan麵包）、jabon（肥皂）、Sandiago（三貂角）；荷蘭語面積單位甲（akkar）、pacht（租山坪）；日語レジオ（收音機）、おじさん（阿叔／阿伯）、きもち（心境）；甚至koh有「台語日語合成詞」︰「きもgiang」、「きもbái」！其實，有足濟近代文明科技詞lóng是日語：美術、民權、商業、財團法人、衛生、手術、狹心症、心肌梗塞lóng是。Koh有︰ka-choa̍h（蟑螂）、sih-nah（閃電）、chim（吻）、tēng（實心）、phàⁿ（空心）等語源猶無清楚。

真濟地名來源是原住民語，羅東（rutung原意是猴）、高雄舊名打狗（makatao平埔族）、六龜（lakuli原義猶無清楚），根據簡炯仁教授統計，台灣地名有七十％至八十％原本是原住民語。

對頂頭簡單紹介咱通知：台語本身相當多元化，m是kan-ta屬漢語！所pái，台語文不應該完全用漢字來寫，按呢不但無精密koh寫bē鬥搭，會失去多元文化本質！適當ê羅馬字使用，像日文文體按呢，是真必要ê做法。

（作者為台灣羅馬字協會創會會長）