美琴做副手

賴清德公開表示講伊欲選蕭美琴做副手，我有佮意，原因真簡單，伊的名足有台灣味！

我的頂－代的查某人號的名上濟的是：罔腰，罔市，招治，金枝，玉葉，阿娥，阿款！

罔腰其實是罔育，罔市其實是罔飼，招治其實是招弟，反應彼个時代重男輕女的觀念，生著查某無歡喜加減飼的心情！

和我仝－代出世的，拄著日本統治台灣咧欲50冬，大日本帝國當強當光榮的年代，號日本名的蓋濟，查埔的叫文雄，武雄，正雄，查某的叫春子，夏子，秋子滿滿是！

我讀初中的時真濟外省老師會嫌遮的查某同學日本仔名歹聴，因為in 家己反日就叫人綴伊反日，予阮遮的查某同學感覺真自卑，真見笑！

到in畢業了後拄著「瓊瑤」的小說風行，in就走去改名，有人原本叫「寶子」改做「倩予」，叫「春子」改做「姸如」，別人看著怪怪，in家已改甲歡喜甲。

瓊瑤的小說佇台灣帶來－時的歪風，啥物「如煙」「夢竹」「紫吟」彼類，空思夢想免食五穀會當過日的少女，予台灣的查某囡仔如痴如醉，所以蓋濟查某囡仔綴伊號這種名。

啊若親像美琴，麗君，淑芬，雅惠這種名就是咱正港的台灣名，小可倯倯，無啥物特別，毋過就是台灣味十足，號這種名的人代表伊有十足的台灣心，予伊來做咱台灣的備位元首才會當代表咱台灣的氣口，讚，我有佮意！

2023.10.8